ཉི་མ་རིང་དུ་རིང་དུ། རྩམ་པ་ཞིམ་དུ་ཞིམ།



བཅར་འདྲི་ཞུ་ཡུལ། དོན་གྲུབ་ཚེ་རིང་།
བཅར་འདྲི་ཞུ་མཁན། རིག་འབྱུང་དོན་གྲུབ་བཀྲ་ཤིས།

༡ ཁྱེད་རང་ངོ་སྤྲོད་མདོར་བསྡུས་ཤིག་གནང་ན་འགྲིག་གམ།
ལན། འགྲིག་དང་འགྲིག ངའི་མིང་ལ་དོན་གྲུབ་ཚེ་རིང་ཟེར། ང་སྐྱེས་ས་མདོ་སྨད་འབའ་མང་ར་ཡིན། ད་ལྟའི་སྡོད་གནས་ཨ་རིའི་བྱང་ཀ་ལི་ཕོ་ཉའི་(Northern California)ནང་གི་མཚོ་སྡེ་གྲོང་ཁྱེར་(Richmond)ཡིན།
༢ ཁྱེད་རང་ལ་དྲ་ལམ་བརྒྱུད་རྩམ་པ་བཙོང་རྒྱུའི་བསམ་བློ་དེ་ཇི་ལྟར་འཁོར་སོང་ངམ།
ལན། ཁ་དཔེ་ལ་མི་རྒས་ན་ཡུལ་དྲན། བྱ་རྒས་ན་ཚང་དྲན་ཟེར་བ་བཞིན། རང་གི་ཕ་ཡུལ་དང་ཁ་བྲལ་ནས་ལོ་ངོ་ཇི་ཙམ་མང་བ་སོང་བ་དེ་ཙམ་གྱིས་རང་གི་ཕ་ཡུལ་དང་ཕ་ཟས་ཤིན་ཏུ་དྲན། རང་གི་ཡུལ་དེ་རང་གི་ལག་ལ་ཡོང་རྒྱུ་དཀའ་ན་ཡང་། འབད་བརྩོན་དུ་མ་ལ་བསྟེན་ནས་རང་གི་ཕ་ཟས་རྩམ་པ་ཚད་ལྡན་ཞིག་བཟོ་ཐུབ་པ་བྱུང་། རང་ཉིད་སྒེར་གྱི་ཚོར་བ་དང་ཉམས་མྱོང་འདི་དག་གཞི་ལ་བཞག་ནས་། ཕྱི་ལོགས་སུ་ཡོད་པའི་བོད་རིགས་དང་དང་རྩམ་པ་དགའ་མཁན་དག་ལ་སྟབས་བདེ་བོའི་སྒང་ནས་ང་ཚོའི་ཕ་ཟས་དེ་མཁོ་སྤྲོད་བྱེད་ཐུབ་རྒྱུར་དམིགས་ནས་དྲ་ལམ་བརྒྱུད་རྩམ་པ་བཙོང་རྒྱུའི་བསམ་བློ་འདི་ཐོག་མར་འཁོར་བ་ཡིན།
༣ རྩམ་པའི་ཚོང་ལས་འདི་འགོ་འཛུགས་བྱེད་དུས་དཀའ་ངལ་ག་རེ་འཕྲད་སོང་ངམ།
ལན། དཀའ་ངལ་མང་པོ་ཞིག་འཕྲད་སོང་། སྤྱིར་ཟ་ཁང་ལྟ་བུ་ཞིག་ཡིན་ན། ས་གནས་དེ་གའི་འཕྲོད་བསྟེན་ལས་ཁུངས་ཀྱི་མཆོག་མཆན་དང་ཚོང་གཉེར་འཛིན་ཡིག་ཡོད་ན་འགྲིག་མོད། ངེད་ཚང་གི་རྩམ་པ་ནི་མངའ་སྡེ་འདི་བརྒལ་ནས་ཨ་རིའི་རྒྱལ་ཡོངས་ལ་གཏོང་གི་ཡོད་པས། མཆོག་མཆན་དང་སྟངས་འཛིན་ཚང་མ་མངའ་སྡེ་གཞུང་གིས་བྱེད་ཀྱི་ཡོད། ནས་བརྔོ་བ་དང་འཐག་པ། གཙང་ཉར་དང་སྣོད་འཇུག་སོགས་ཚང་མ་འཕྲོད་བསྟེན་ལས་ཁུངས་ཀྱི་བརྟག་དཔྱད་ཆ་ཚང་བའི་ཆེད་བཙུགས་ཐབ་ཚང་བརྒྱུད་བྱེད་དགོས། འདིའི་སྒང་ལ་དཀའ་ངལ་མང་པོ་འཕྲད་སོང་། ང་རང་རྩམ་པ་ལ་དུངས་ཆེ་བ་དང་རྩམ་པ་བོད་མི་རིགས་ལ་དྲིན་ཆེ་བ་སོགས་བྲལ་མི་ཕོད་པའི་འབྲེལ་བ་ཟབ་མོ་ཞིག་གིས་དཀའ་ངལ་མང་པོ་ཞིག་ལ་གདོང་ལེན་བྱེད་ཐུབ་པ་བྱུང་།
༤ བོད་ལ་རྩམ་པའི་རིགས་ཁ་ཤས་ཡོད་པ་ནས་ ( དཔེར་ན། ནས་རྩམ་དང་སྲན་རྩམ་ལྟ་བུ། ) ཁྱེད་ཚོས་བཟོ་བཞིན་པའི་རྩམ་པ་དེ་རིགས་གང་ཡིན། ངོ་སྤྲོད་ཅིག་གནང་རོགས།
ལན། བོད་ལ་རྩམ་པའི་རིགས་མང་པོ་ཡོད་པའི་ནང་ནས་བོད་ས་ཡོངས་རྫོགས་ལ་དར་ཁྱབ་ཆེ་བ་དེ་ནས་རྩམ་རེད། ངེད་ཚང་གིས་བཟོ་བཞིན་པའི་རྩམ་པ་དེ་ཡང་ནས་རྩམ་ཡིན། འོན་ཀྱང་། རྒྱ་བལ་འབྲུག་གསུམ་ཏུ་མ་རྨས་ལོ་ཏོག་གི་རྩམ་པ་དང་ཨ་ཞམ་གི་རྩམ་པ་དེ་དར་ཁྱབ་ཤིན་ཏུ་ཆེ་བས། དེ་དགོ་མཁན་ཡོད་ན་དེ་མངགས་ཆོག་ཞུས་ཡོད། རྩམ་པ་ལ་ཡང་ས་ཁུལ་གྱི་དབང་གིས་དགའ་ཕྱོགས་གཉིས་འདུག མདོ་སྟོད་སྨད་གཉིས་སུ་རྩམ་པ་རགས་མོ་ལ་དགའ་བོ་བྱེད་ལ་དབུས་དང་གཙང་གི་ཕྱོགས་སུ་རྩམ་པ་ཞིམ་མོ་ལ་དགའ་བོ་བྱེད་ཀྱི་འདུག དེ་ཡང་གཙོ་བོ་ས་ཁུལ་དེ་དག་གི་རྩམ་པ་ཟ་སྟངས་དང་འབྲེལ་འདུག ངས་རྩམ་པ་དེ་གཉིས་ལ་སྤྱིར་བཏང་གི་རྩམ་པ་དང་ཨ་མདོའི་རྩམ་པ་ཞེས་མིང་བཏགས་ཡོད། སྤྱིར་བཏང་རྩམ་པ་དང་ཨ་མདོའི་རྩམ་པ་གཉིས་ལ་རགས་ཞིབ་ཀྱི་ཁྱད་པར་མ་གཏོགས་གཞན་དམིགས་བསལ་ཁྱད་པར་མེད། དེ་གཉིས་ལ་ནས་དཀར་གྱི་རྩམ་པ་དང་ནས་ནག་གི་རྩམ་པ་བཅས་གཉིས་གཉིས་བྱས་ནས་བཞི་ཡོད།
༥ ཁྱེད་ཀྱིས་དྲ་ལམ་བརྒྱུད་རྩམ་པ་བཙོང་རྒྱུ་འགོ་བཙུགས་པ་དང་རྩམ་པ་ཉོ་མཁན་ཇེ་མང་ལ་ཕྱིན་སོང་ངམ།
ལན། བཤད་ཁག་པོ་འདྲ་ཞིག་འདུག སྤྱིར་བཏང་ང་རང་གིས་དམིགས་ས་དེ་བོད་མི་དག་ལ་དམིགས་པ་ཡིན་མོད། དྲ་ལམ་ནས་ཉོ་མཁན་མང་ཆེ་བ་བོད་མི་མ་རེད། ཡང་ཁ་པར་བརྒྱུད་མངགས་མཁན་དང་ས་གནས་སུ་ཉོ་མཁན་མང་ཆེ་བ་བོད་མི་རེད། ཕལ་ཆེར་བོད་པའི་སྤྱི་ཚོགས་སུ་ད་དུང་ཡང་དྲ་ལམ་ནས་ཉོ་ཚོང་བྱེད་རྒྱུའི་གོམས་གཤིས་དེ་ཤུགས་ཆེན་པོ་དར་མེད་པས་རེད་འདོད། ཉོ་མཁན་ལ་ངེས་བ་མེད་ཀྱང་ས་ག་ཟླ་བའི་ནང་ཉོ་མཁན་མང་པོ་འདུག
༦ ཁྱེད་ཀྱིས་བཟོ་བཞིན་པའི་རྩམ་པ་ལ་དམིགས་བསལ་གྱི་ཁྱད་ཆེས་ག་རེ་ཡོད།
ལན། ངེད་ཚང་གིས་བཟོ་བཞིན་པའི་རྩམ་པ་ལ་དམིགས་བསལ་གྱི་ཁྱད་ཆོས་འདྲ་བོ་གཉིས་བཤད་ན་འདོད། གཅིག་དཀའ་ངལ་དང་འགྲོ་སོང་ལ་མ་འཛེམས་པར་རྩམ་པའི་རྒྱུ་ཆ་ལེགས་བདམས་བྱས་ཡོད།
ཨ་རིའི་ཚོང་ར་ན་ནས་ཀྱི་རིགས་མང་པོ་འདུག སྲོག་ཆགས་གི་བཟའ་ཆས་ལ་སྟེར་རྒྱུའི་ནས་དང་མིས་ཟ་རྒྱུའི་ནས། མིའི་ཟ་ཆོག་པ་ཡིན་ཡང་དེའི་ནང་ན་ཡང་རྫས་སྐྱེས་ཀྱི་ནས་དང་རྗས་རིགས་ཀྱིས་མ་ལྷད་པར་རང་བྱུང་ལྷན་སྐྱེས་ཀྱི་ནས་རིགས་བཅས་ཁག་མི་འདྲ་བ་མང་པོ་འདུག དེ་དག་ཚང་མ་ཕྱི་རོལ་ནས་བལྟས་ན་ཁྱད་པར་ཆེན་པོ་མེད་རུང་། གོང་ཚད་ཀྱི་ཐད་ཁྱད་པར་ཧ་ཅང་ཆེན་པོ་རེད། མིའི་གཟུགས་པོའི་འཕྲོད་བསྟེན་གྱི་སྐོར་ལ་བཤད་མི་དགོས་བ་རེད།
ངེད་ཚང་གིས་ནས་དེ་(Whole Food Market) བརྒྱུད་ནས་ཉོ་གི་ཡོད། ཁོང་ཚོའི་ནས་དཀར་དེ་ཁ་ཎ་སྒྲ་དང་ནས་ནག་དེ་ཨར་རྗིན་ཁྲེས་ན་ནས་ཡོང་གི་ཡོད། རྫས་རིགས་ཀྱི་ལྷད་མེད་པར་རང་བྱུང་གི་དྲོད་གཤེར་ལ་བསྟེན་ནས་སྐྱེས་བས་རྒྱུ་ཆ་ཕུན་སུམ་ཚོགས་པ་རེད། ང་ཚོ་བོད་ཀྱི་སྲོལ་རྒྱུན་ལྟར་ནས་ཆུ་རིས་བྱས་ཏེ་ནས་བཤུན་ཕུད། ནས་བྱེ་བརྔོས་བྱས་ནས་རྡོ་འཁོར་ལ་དྲངས་ནས་འཐག་གི་ཡོད།
༧ རྩམ་པ་ཟོས་ན་གཟུགས་གཞི་བདེ་ཐང་ལ་ཕན་ནུས་ག་རེ་ཐོན་གི་རེད།
ལན། ཚན་རིག་པ་དང་གསོ་རིག་པ་མང་ཚོས་མགྲིན་གཅིག་ཏུ་རྩམ་པ་ལ་ཟས་རིགས་གཞན་ལ་མེད་པའི་ལུས་སྟོབས་བསྐྱེད་བྱེད་དང་ནད་རིགས་འགོག་ནུས་ཀྱི་གསོ་བྱེད་ནུས་བ་དམིགས་བསལ་བ་ཞིག་ཡོད་པར་བརྗོད་ཀྱི་ཡོད། ༧གོང་ས་མཆོག་གིས་ཀྱང་བོད་ཀྱི་རྩམ་པ་འདི་ཟས་རིགས་གཞན་དང་མི་འདྲ་བའི་ཆེ་བསྟོད་མང་པོ་གནང་འདུག ལྷག་པར་དུ་གཅིན་མངར་གྱི་ན་ཚ་ལ་ཤིན་ཏུ་ཕན་པར་འདོད། སྨན་གཞུང་ནས་གསུངས་བའི་རྩམ་པའི་ཕན་ནུས་མདོར་བསྡུས་ཤིག་ང་ཚོའི་དྲ་ངོས་སུ་བཞག་ཡོད། ང་ཚོ་བོད་ཀྱི་རྩམ་པ་དེ་རྒྱའི་ཚོང་ཁང་ནང་གི་འགྱིག་ཤོག་དབར་གྱི་ཉ་སྐམ་པོ་དང་ཤེལ་དམ་ནང་གི་འབུ་གསོན་པོ་ལྟ་བུ་མ་ཡིན་པར། འཕྲོད་བསྟེན་དང་བྲོ་བ་གང་ཅིའི་ཐད་དམིགས་བསལ་གྱི་ཁྱད་ཆོས་ལྡན་པ་ཞིག་ཡིན་པས། སུ་ཞིག་གིས་བོད་ཀྱི་ཟ་མ་ངོ་མ་དེ་ཅི་རེད་ཞེས་དྲིས་ཚེ། རྩམ་པ་ཞེས་ང་ཚོས་སྤོབས་པའི་སྒོ་ནས་བཤད་ཆོག་གི་རེད།
༨ ད་ཕན་ཁྱེད་ཚོའི་རྩ་ནས་རྩམ་པ་ཉོ་མཁན་ཚོས་ཁྱེད་ཚོའི་རྩམ་པར་དགའ་མོས་གནང་གི་འདུག་གམ།
ལན། དགའ་བོ་གནང་གི་འདུག ལྷག་པར་དུ་མི་རྒན་པ་ཚོའི་ནང་ན་དགའ་བོ་གནང་མཁན་མང་པོ་འདུག མང་པོ་ཞིག་གིས་རྒྱ་བལ་འབྲུག་གསུམ་ནས་ཚུར་ཡོང་མཁན་དེ་འདྲར་རྩམ་པ་རེ་འཁྱེར་ཤོག་ལབ་ཀྱང་གནམ་ཐང་ནས་རྙོག་དྲ་མང་པོ་རེད། ད་ཡིན་ན་དཀའ་ངལ་དེ་སེལ་ཚར་རེད། གསུངས་ནས་དགའ་བོ་བྱེད་མཁན་དང་། ཡང་སྐོར་ཞིག་གིས་འདི་ནས་ས་གནས་གཞན་ལ་གཉེན་འཕྲད་ལ་བསྐྱོད་པའམ་ལེགས་སྐྱེས་སུ་འཁྱེར་ནས་འགྲོ་མཁན་མང་པོ་འདུག་ལ།
ཁྱེད་ཚོའི་རྩམ་པ་དེ་ཕྱིའི་བཟོ་བཀོད་གཅིག་པོའི་སྒང་ནས་ཀྱང་སྤུས་ལེགས་པོ་དང་སྙིང་རྗེ་བོ་ཡོད་པས་། དེ་ང་ཚོ་ས་གནས་འདིའི་བོད་མིའི་ཁྱད་ཆོས་ཤིག་རེད་གསུངས་ནས་དགའ་མོས་གནང་མཁན་ཡང་འདུག
༩ ཕྱི་རྒྱལ་ལུང་བར་ཡོད་པའི་བོད་མིས་ཚོས་ཁྱེད་ཚང་ནང་བཞིན་ཚོང་ལས་ཆུང་ཚགས་ཀྱི་རིགས་གཉེར་རྒྱུ་གལ་ཆེན་པོར་མཐོང་གི་འདུག་གམ།
ལན། ཧ་ཅང་གལ་ཆེན་པོ་རེད། ལྷག་པར་དུ་བོད་རང་ལ་ཡོད་པའི་སྲོལ་རྒྱུན་གྱི་ལག་རྩལ་དང་ཤེས་བྱའི་རིགས་དེ་དག་བེད་སྤྱོད་བྱས་ནས་རང་ཉིད་སྡོད་སའི་སྤྱི་ཚོགས་ལ་ཞབས་ཞུ་སྒྲུབ་པའམ་སྒེར་གཉེར་གྱི་ཚོང་ལས་ཆུང་ཚགས་དེ་འདྲ་འཛུགས་ཐུབ་ན། རང་ཉིད་སྒེར་ལ་ཕན་པ་ཙམ་མ་ཟད་བོད་མིའི་སྲོལ་རྒྱུན་རྒྱུད་འཛིན་ལ་ཡང་ཕན་ཐོགས་ཡོད། ཚོང་གི་ཁེ་བཟང་འབོར་ཆེན་བཟོ་མ་ཐུབ་རུང་རང་གི་ཁྱིམ་ཚང་ནས་སོ་སོའི་སྲོལ་རྒྱུན་སྣ་གཅིག་ཡིན་རུང་ཉར་གང་ཐུབ་བྱེད་རྒྱུ་ཧ་ཅང་གལ་ཆེན་པོ་རེད་དྲན།

༡༠ མ་འོངས་བར་ཁྱེད་ཚོའི་རྩ་ནས་རྩམ་པ་ཉོ་མཁན་ཚོའི་ཆེད་དུ། བོད་ཀྱི་དྲ་ལམ་རྩམ་པ་ཚོང་ཁང་ལ་འབྲེལ་བ་གནང་སའི་ཁ་པར་ཨང་གྲངས་དང་གློག་འཕྲིན། དྲ་བྱང་། ཡིག་ཟམ་བཅས་འདི་རུ་བཀོད་ན་འགྲིག་གམ།
ལན།འགྲིག་དང་འགྲིག ཁ་པར་ཨང་གྲངས། ༥༡༠ ༢༣༠ ༨༡༥༢ གློག་འཕྲིན་ཨང་གྲངས། ༥༡༠ ༦༤༢ ༡༩༤ ཡིག་ཟམ།tibetantsampa@gmail.com དྲ་བྱང་། http://www.tibetantsampa.com

བཅར་འདྲི་དང་ལེན་གནང་བར་བཀའ་དྲིན་ཆེ།


Advertisements

དཔྱད་མཆན་སྤེལ།

Fill in your details below or click an icon to log in:

WordPress.com Logo

You are commenting using your WordPress.com account. Log Out /  བཟོ་བཅོས། )

Google+ photo

You are commenting using your Google+ account. Log Out /  བཟོ་བཅོས། )

Twitter picture

You are commenting using your Twitter account. Log Out /  བཟོ་བཅོས། )

Facebook photo

You are commenting using your Facebook account. Log Out /  བཟོ་བཅོས། )

Connecting to %s